yawrupa-parlament-ilham-toxti-2016-2

Yawropa parlaméntida uyghur ziyaliysi ilham toxti heqqide ilmiy muhakime yighini échildi

2016 – Yili 5 – Ayning 25 – Küni yawropa parlaméntida wakaletsiz milletler – Xelqler teshkilati, gérmaniye xeter astidiki xelqler jemiyiti we yéqinda yawropada qurulghan «ilham toxtini qollash guruppisi» namliq ammiwi guruh – Teshkilatlarning teshkillishi bilen ilham toxtigha ait ilmiy muhakime yighini ötküzüldi.

Bu qétimqi paaliyetni uyushturghuchilardin bash shtabi gérmaniyediki «yawropa sherqiy türkistan birliki» ning reisi shundaqla «ilham toxti guruppisi» ning qurghuchiliridin biri bolghan enwerjan ependi we uyghur siyasiy paaliyetchiliridin dunya uyghur qurultiyi ijraiye komitéti mudiri dolqun eysa ependiler bilen söhbet élip barduq.

Enwerjan ependi aldi bilen bu qétimqi yighin ishtirakchiliri we yighinning élip bérilish jeryani heqqide toxtilip ötti. Enwerjan ependi bu qétimqi yighingha yawropa parlaméntining bir qisim ezalirini öz ichige alghan halda amérika, yawropadin bir türküm alim, tetqiqatchi we kishilik hoquq paaliyetchilirining qatnashqanliqini hemde muhakime yighinining ikki bölüm boyiche élip bérilghanliqini, her bölümde 4 neperdin jemiy 8 neper ademning maqale oqughanliqini éytti.

1 – Bölümde asasen uyghur rayonining omumiy weziyiti, muhajirlar mesilisi, uyghurlar bilen xitaylar otturisidiki ziddiyetning menbesi, xitay hökümitining uyghurlargha élip bériwatqan bésim siyasetliri heqqidiki maqaliler؛ 2 – Bölümde bolsa, mexsus ilham toxtining hayati, ilmiy emgekliri, uning xitay – Uyghur dostluqini berpa qilish üchün körsetken tirishchanliqi, uyghurlarning heq – Hoquqliri üchün élip barghan küreshliri we axirida naheq türmige tashlanghanliqi, uning hetta xitay ziyaliyliri teripidinmu qollap – Quwwetlengenliki qatarliq mesililer otturigha qoyulup, bundaq tinchliqperwer insanning xelqara sehnide saxarof mukapati we bashqimu mukapatlargha körsitilishi heqliq ikenliki otturigha qoyulghan.

Dunya uyghur qurultiyi ijraiye komitétining mudiri dolqun eysa ependi yighin meqsitining ilham toxtini saxarof mukapatigha nail qilish üchün jamaet pikri hazirlash we ilham toxti mesilisini yawropa parlaméntida küntertipke ekélish arqiliq nöwettiki uyghurlarning kishilik hoquq weziyitige dunyaning diqqitini yene bir qétim jelp qilish ikenlikini qeyt qildi. Dolqun eysa ependi yene, ilham toxti mesilisining xelqaralishishining uyghurlarning milliy dewa ishliri hem uyghur xelqining nöwettiki kishilik hoquq weziyitige nisbeten tesiri heqqidimu qarashlirini otturigha qoyup ötti. Axirida u ilham toxti mesilisini chöridigen halda uyghurlardin kütidighan ümidlirini izhar qildi. Enwerjan ependi axirida bu qétimqi ilmiy muhakime yighinida élinghan qarar üstide toxtilip ötti.