Teywen, yapon axbaratchiliri tokyoda uyghur mesililiri boyiche mexsus söhbet élip bardi

Teywen, yapon axbaratchiliri tokyoda uyghur mesililiri boyiche mexsus söhbet élip bardi

25-May tokyoda «teybéy waqti» géziti we yaponiye döletlik téléwiziyesi ayrim-Ayrim halda uyghur mesililiri boyiche mexsus söhbet élip bardi.

Yaponiyede ziyarette boluwatqan dunya uyghur qurultiyi rehberliridin rabiye qadir xanim muawin reisi séyit tümtürk qatarliqlar teywendin chiqidighan «teybéy waqti» géziti we yaponiye döletlik téléwiziye qanili NHK ning mexsus söhbitide bolghan.

Teywen «teybéy waqti» géziti muxbiri méyki chyang shu yer waqti chüshtin kéyin saet beshtin altige qeder tokyodiki kindu méhmansariyining ayrimxanisida dunya uyghur qurultiyi reisi rabiye qadir xanim bilen nöwettiki uyghur élining yéqindin buyanqi omumiy ehwali toghrisida söhbet élip barghan.

Ziyaritimizni qobul qilghan rabiye qadir xanim muxbir méyki chyang bilen élip bérilghan söhbet heqqide melumat berdi.

Teywen muxbir méyki chyang rabiye qadir xanimning yéqinda hakimiyet béshigha chiqqan teywen prézidénti sey yingwén xanimdin uyghur mesilisi heqqide némilerni kütidighanliqini sorighanda, rabiye qadir xanim prézidént sey yingwénning uyghur kishilik hoquq mesilisige yéqindin köngül bölüshini ümid qilidighanliqini bildürgen.

Igilishimizche, shu küni yene yaponiye döletlik téléwiziye qanili NHK ning muxbirliri rabiye qadir xanimgha hemrah bolup yaponiyede ziyarette boluwatqan dunya uyghur qurultiyi muawin reisi séyit tümtürk bilen nöwettiki uyghur musapirlar mesilisi toghrisida yéngidin höjjetlik filim ishleshni pikirleshken.

Séyit tümtürk ziyaritimizni qobul qilip bu heqte toxtaldi.

Séyit tümtürkning bildürüshiche, mezkur téléwiziye qanili 2014-Yildin bashlap tayland, malayshiya qatarliq sherqiy jenubi asiya elliride panahlinip, kéyin türkiyening qeyseri shehirige kélip yerleshken uyghur musapirlar heqqide mexsus höjjetlik filim ishligen.

Dunya uyghur qurultiyi muawin reisi séyit tümtürkning qarishiche, yaponiye NHK téléwiziye qanilining uyghur musapirlar mesilisi toghrisida mexsus filim ishlishi nöwettiki uyghur musapirlar mesilisini dunyagha anglitish we xelqara jemiyetning qollishini qolgha keltürüshte belgilik rol oynaydiken.

Yaponiye döletlik téléwiziyesi NHK qanili yaponiyediki nopuzluq qanallardin biri bolup, mezkur qanal muhajirettiki tibet, uyghur kishilik hoquq paaliyetchiliridin dalay lama, rabiye qadir xanim qatarliqlar bilenmu ilgiri köpligen söhbet programmisi filimlirini ishligen.